Garðhönnun: frönsk áhrif í garði í Alabama

Það var ást við fyrstu sýn þegar ég sá þennan franska glugga með útsýni út í garðinn á vefsíðu Traditional Home. Ég hugsaði um þessa mynd og þennan garð í allan dag á meðan ég var að vinna í mínum eigin, sem er heldur tilþrifaminni og ekki eins litríkur (kemur allt rólega, núna eru rósirnar fyrir framan hús loksins byrjaðar að blómstra!).

Í hinu sögulega hverfi Redmont í Birmingham, Alabama stendur hús frá árinu 1926 sem er í eigu innanhússhönnuðarins Mary Finch og eiginmanns hennar. Þau keyptu húsið árið 2004 og leituðu til garðyrkjumeistarans Norman Kent Johnson til að fá aðstoð við að hanna garðinn upp á nýtt. Hann var berangurslegur og í honum var aðallega gamalt og ofvaxið bláregni sem sárlega þurfti að klippa til og snyrta. Áður en þau keyptu húsið þá hafði Mary ekki verið mikil garðyrkjukona en eins og segir í greininni „stóðst hún ekki mátið að vinna með ómálaðan striga.“ Franskir garðar voru henni innblástur eftir að hafa skoðað vínekrur í Frakklandi og ferðast um Provence-hérað. Hún er einlæg þegar hún segir hlæjandi: „Sennilega er það franskasta við þennan garð allt það magn af frönsku víni sem hér hefur verið deilt.“

Að ofan sjáið þið fjólubláa salvíu og glæsilegar svalir þar sem þau njóta þess að drekka kaffið sitt á morgnana á meðan þau dást að garðinum og útsýninu. Í dag hljómar Mary eins og sannur garðunnandi þegar hún segir: „Það eru alltaf einhverjar breytingar ... Það er spennandi að sjá nýtt lauf myndast, blöð breytast eða blóm sem er við það að blómstra.“

Plantan hér að ofan er rauð verbena, sem ég hef aldrei séð áður. Hún gengur einnig undir nafninu ,Voodoo Star' eða 'Vúdú-stjarna' og laðar að sér fiðrildi, fulga og býflugur. Rauða blómið fyrir ofan hana kallast Schizanthus.

Hér fyrir neðan má sjá plöntu sem kallast ,Purple Flame' eða ,Fjólublár logi' (Cyclamen hederifolium) og englastyttur í miðju formlega garðsins (enska: parterre).

Útsýnið baka til er stórkostlegt, en frá svölunum má njóta formlega garðsins og hinum megin við dalinn blasir við Appalachian-fjallgarðurinn. Það voru Mary og garðyrkjumeistarinn Norman Kent Johnson sem bættu formlega garðinum við, svona til að halda franskri hönnun á lofti. Horn hans mynda fjórir stórir vasar sem um leið afmarka garðinn.

Í garðinum er opin verönd sem þau nota gjarnan þegar gesti ber að garði því í húsinu sjálfu er ekki formleg borðstofa. Á frístandandi vegg hanga luktir sem gefa frá sér milda birtu þegar sólin sest.

Ég notaði ekki allar myndirnar úr greininni í þessa færslu en ég lýk þessu með steinlögðum stíg og gömlu járnhliði sem hefur yfir sér franskan blæ.

myndir:
Jean Allsopp fyrir Traditional Home

rýmið 33

- sundlaug og verönd húss í georgískum stíl frá ca. 1840 í Sussex, Englandi

Á enska blogginu í dag er innlit á skemmtilega vinnustofu í Hudson Valley í New York. Kíkið endilega á það ef þið hafið áhuga. Ég vona að þið hafið átt gleðilegan þjóðhátíðardag í gær!

mynd:
Dominic Blackmore fyrir Traditional Home af blogginu Savy Home

góða helgi

mynd:
Katelyn James af blogginu Grey Likes Weddings

augnablikið 04

Marilyn Monroe, 19 ára á miðjum Pacific Coast þjóðvegi í Kaliforníu, 1945.

mynd:
Andre de Dienes af síðunni Facie Populi

espresso macchiato + hádegisverður á Konrad

Á laugardaginn fór ég inn í borg og eyddi deginum með vinkonu minni. Planið var að smakka kaffið og borða hádegisverð á Konrad. Við fengum borð úti í skugganum og byrjuðum á kaffinu. Ég er yfirlýst latte-manneskja en undanfarið hef ég leyft mér að lifa hættulega og fæ mér þá espresso macchiato þegar ég sest niður á kaffihúsum en gríp með mér latte í götumáli ef ég er á ferðinni. Ekkert smá hugrekki!

Ég er ekki kaffisérfræðingur og hef ekki hugmynd um hvernig á að lýsa hinum fullkomna kaffibolla en ég veit að espresso bollinn sem ég fékk á laugardaginn var fullkominn. (Ef þið hafið áhuga á kaffismökkun þá verð ég að benda ykkur á Barista's Log viðbótina sem einn vinur minn þróaði sem er bæði kaffi- og tölvugúrú. Þegar ég sé þessar myndir þá væri ég alveg til í að vita meira um list kaffismökkunar.)

Þegar við vorum búnar að drekka kaffið færðum við okkur inn til að snæða hádegisverð. Karríréttir eru sérgrein þeirra á Konrad en á laugardögum er einfaldleikinn í eldhúsinu allsráðandi og ég fékk mér grænmetisböku með salati. Maturinn bragðaðist mjög vel. Ég lýg ekki, ég er enn að hugsa um þessa böku og stefni á að fá mér hana aftur fljótlega. Ég fékk mér líka glas af lífrænu rósavíni sem fullkomnaði máltíðina.

Eins og sést á myndunum er Konrad einn af þessum hráu stöðum sem mér finnst alltaf skemmtilegir. Hann er í hjarta borgarinnar og er reyklaus og er auk þess bar sem býður reglulega upp á uppistand. Við borðin má ýmist sjá viðar- eða leðurstóla og upp við barinn eru þeir í iðnaðarstíl. Loftbitarnir eru sýnilegir, veggir hvítir fyrir utan einn sem er veggfóðraður með blómamynstri. Það eru engir matseðlar heldur er allt skrifað á krítartöflur.

Mér leiðist að koma inn á staði þar sem stemningin er einhvern veginn þvinguð; ekki afslöppuð. Mér líkar það best þegar eigendur kaffi- og veitingahúsa leggja meiri áherslu á að skapa gott andrúmsloft heldur en að dæla peningum í glæsilegar innréttingar og skrautmuni. Konrad er einmitt svona afslappur staður sem er laus við alla tilgerð og þar sem viðmót starfsmanna er vingjarnlegt.

Ég tók þessa mynd nýverið sem sýnir stemninguna fyrir utan staðinn. Hún er hluti af færslu á ensku útgáfu bloggsins þar sem ég sagði frá því þegar ég uppgötvaði fyrst götuna Rue du Nord.

Konrad, Café & Bar
7 rue du Nord
Luxembourg

myndir:
Lísa Hjalt

Garðhönnun: rómantískir litir í The Hamptons

Í dag ætlaði ég að birta myndir sem ég tók á Konrad kaffihúsinu inni í borg á laugardaginn en í gærkvöldi var ég í nettri súkkulaðivímu þegar ég rakst á þennan rómantíska garð í The Hamptons á vefsíðu Traditional Home og það var ekki aftur snúið. Ég kenni líka þessum fallegu rósum um, þær kallast Double Delight eða tvöföld ánægja og þær heilluðu mig upp úr skónum.

Hönnun garðsins er samvinna eigandans Jane Goldman, sem er haldin mikilli garðástríðu og veit upp á hár hvað hún vill fyrir garðinn, og hönnuðanna Jane E. Lappin og Arlene Gould. Í garðinum er að finna margar tegundir af rósum og Zelkova tré, sem eru í miklu uppáhaldi hjá Goldman. Eitt slíkt sést á myndinni hér að ofan en hún sýnir líka gestahúsið.

Til að lýsa garðinum sínum notar Goldman orðin friðsæll og skipulagður og þegar hún er spurð hvernig hún skemmtir gestum utandyra þá svarar hún að garðurinn sé skemmtunin. Gott svar!

Hún elskar hvíta, fjólubláa og bleika liti, en garðhönnuðurinn Lappin lýsir þessum bleiku litum sem fullum af lífi, köldum bleikum og bleikustu bláum. Þeir sjást greinilega á myndinni hér að neðan þar sem þeir mynda ákaflega fallega litapalettu.

Bleika blómið hér að ofan kallast Dahlia Park Princess og fyrir neðan sést nærmynd af gamaldags klifurrósum eða New Dawn Climbing Rose á pergólunni, sem þjónar sem setustofa utandyra.

Þessi garður er svo sannarlega skemmtun!

Persónulega er ég ekki mjög hrifin af þessum stóru vösum (það eru fleiri en enn í garðinum) en blómin í vösunum og í kringum þá - rósir, geraníur, bacopa (veit ekki íslenska heitið) bergfléttur - eru dásamleg. Goldman ferðaðist um England, Frakkland og Ítalíu og skoðaði þar marga glæsilega garða til þess að fá hugmyndir fyrir sinn. Ég geri ráð fyrir að þessir vasar gefi til kynna einhvers konar suðurevrópsk áhrif úr þeirri ferð.

Ég sleppti einhverjum myndum úr umfjölluninni en ég varð að enda þennan póst á lavender í blóma, en hann er fær að vaxa í kringum sólskífu innan um falleg lág limgerði.

myndir:
Tria Giovan fyrir Traditional Home

eftirminnilegt sumar

Í síðustu viku var sumarið upp á sitt besta, með hæsta hitastiginu til þessa núna á laugardaginn, sem varð til þess að hugurinn reikaði á ströndina. Luxembourg liggur því miður ekki að sjó en við erum með árbakka og svo er Upper Sûre þjóðgarðurinn í norðvesturhluta landsins, en við eigum alveg eftir að kíkja þangað. Það er bara eitthvað við sjóinn, að finna sandinn milli tánna og vindinn í hárinu. Þegar við bjuggum í Antwerpen þá tók bara einn klukkutíma að keyra út á belgísku ströndina eða á strönd einhver staðar í Hollandi, en ég get ekki kvartað því nú erum við með garð.

Þegar tími bóndarósanna rennur í garð þá eru þær einu blómin sem ég hugsa um. Í ár leið mér öðruvísi - sennilega var það vegna þessa óvenjulega kalda vors - og fann að ég dróst að bláum og fjólubláum blómum, þá einkum írisi og lavender, eins og ég hef þegar sagt ykkur frá. Lavender plönturnar mínar virðast hafa lifað það af að ég var að dreifa þeim og núna bíð ég eftir að þær blómgist. Það besta við lavender er að það þarf engan garð. Það má kaupa lavender í blómapotti og geyma úti á svölum. En því er jú öðruvísi farið á Íslandi. Þar þarf gróðurhús en það má líka geyma lavender innandyra, þá í sólríkum glugga. Lyktin er unaðsleg.

Kannist þið við verbena jurtina? Ég hef aldrei átt verbena plöntu, en veit að ilmkjarnaolían hefur upplífgandi eiginleika. Eftir að ég sá myndina að ofan til hægri þá langar mig að hafa verbena í garðinum. Plantan til vinstri kallast scaevola en ég hef ekki hugmynd um hvað hún heitir á íslensku, mér finnst hún líka falleg.

Höldum aftur á sjávarsíðuna og kíkjum á stíl sem þarf ekki að kosta mikið.

Hvert sem ég fer, hvort sem það er í búðir, á bænda- eða blómamarkaði, út um allt er fólk með klassískar franskar töskur úr basti. Þær eru til í öllum stærðum og gerðum og eru líka frábærar á ströndina. Nýlega fann ég heimasíðu Medina sem er með gott úrval af bast töskum og í gær fann ég aðra síðu sem selur líka klassískar bast töskur sem eru handgerðar í Marokkó. Ég bætti bara tenglunum í færsluna til að gefa ykkur hugmyndir.

Ég er afskaplega lítið fyrir plastdót og finnst það miklu skemmtilegra að eiga hluti úr náttúrulegum efnum til að hafa með á strönd eða í lautarferð.

Að vera vel til fara í sumar þarf ekki að kosta mikið. Ég veit að það er ekki H&M verslun á Íslandi en það er jú sú búð sem maður getur alltaf treyst á að fá ódýra lykilhluti í fataskápinn. Nýjasta auglýsingaherferð þeirra sýnir nokkra slíka sem má finna í öðrum verslunum. Mér líkar þessi safarí litur sem fyrirsætan klæðist á myndinni. Ef þið eigið þegar eitthvað svona í skápnum ykkar (eitthvað karlmannlegra fyrir herrana!) þá eruð þið tilbúin fyrir Nauthólsvíkina eða næstu strönd þegar veður leyfir. (Má ekki alltaf kippa teppi með?)

Þegar ég las að myndirnar fyrir auglýsingaherferðina voru teknar í Tulum, Mexíkó, mundi ég eftir myndinni hér að neðan í ferðamöppunni minni. Ég hef aldrei komið til Mexíkó en ég væri ekkert á móti því að vera stödd einmitt núna á þessum stað í Tulum.

Hvað sem þú tekur þér fyrir hendur í sumar, gerðu sumarið eftirminnilegt!

myndir:
1: Nuevo Estilo / 2: Lovely Leaf Studio af síðunni Style Me Pretty / 3-4: William P. Steel fyrir Country Living / 5: Aina af blogginu Modern Country / 6-7: Anders Schønnemann / 8: Terry Richardson fyrir H&M, auglýsingaherferð sumar 2013 | fyrirsæta: Doutzen Kroes / 9: Mattias Olsson af Condé Nast Traveler (Playa Mambo, Tulum, Mexíkó)